HERITAGE CONSERVATION STAKEHOLDERS CONFERENCE 2018

Heritage conservation is action taken to sustain the value, meaning and significance of cultural resources from the past, for the use of the present and inspiration of future generations. And all decisions of conservation are based on the significance and meaning, the core value of a heritage resource. There are various types of significance such as historical, architectural, aesthetic, spiritual or social. It is established through physical, oral and archival research and study and is embodied in the place itself, its fabric, a setting, use, associations, meanings, records, related places and related objects. Heritage conservation is about protection and promotion of heritage significance or making heritage meaningful to the community.

Join us, as we conduct a "HERITAGE CONSERVATION STAKEHOLDERS CONFERENCE" on September 13, 2018 at Casa Comunidad de Tayabas. And help us to Protect, Conserve, Preserve and Promote the Nations Cultural Heritage in partnership with the Cultural Properties Division of the National Museum of the Philippines and City Government of Tayabas through Cultural Heritage Preservation Office.

Oplan Linis Tulay isinagawa

ng mga kabataang mag-aaral

            Nitong nakaraang Oktubre 21, 2017 ay isang Oplan Linis Tulay na may temang “Pangalagaan, Panatilihin, Pagyamanin ang Tulay ng Tayabasin” ang isinagawa ng mga mag-aaral ng Department of Education Tayabas City Division Stand Alone Senior High School sa Puente de Malagonlong. Malugod itong sinuportahan ng Lokal na Pamahalaan ng Lungsod ng Tayabas, Oplan Sagip Tulay, Barangay Mateuna at Barangay Lakawan.

            Naglinis sa Tulay ng Malagonlong ang mga mag-aaral kasama ang mga residente ng Barangay Mateuna at Barangay Lakawan. Nagtabas sila ng mga damo at namulot ng mga basura na nakakalat sa paligid.

            Matapos ang paglilinis ay isang talakayan ang pinamunuan ni Ginoong John Ysrael D. Valdeavilla na may temang “Narito Ngayon, Narito Pa Kaya Bukas?” kung saan tinalakay niya ang kahalagahan ng mga Pamana ng Lahi sa ating siyudad.

            Tinalakay dito ang kahalagahan ng pag-iingat at pagpapahalaga sa mga Pamana ng Lahi sapagkat pag ito ay napabayaan ito ay maaaring tuluyan ng masira at mawala sa atin. Kabilang sa mga Pamana ng Lahi ay ang ating Basilika at mga Lumang Tulay.

            Isinalaysay din ni Valdeavilla ang kasaysayan ng Tulay ng Malagonlong na ayon sa kanya ay kung mapapansin ay kakaiba ang pangalan nito kumpara sa iba pang mga lumang tulay. Kung ang ibang mga lumang tulay ay ipinangalan sa mga tao o mga ilog kapansin-pansin na ang Tulay ng Malagonlong lang ang hindi ipinangalan sa tao o ilog.

            Ito raw ay hango sa salitang “mala-gulong” o parang gulong dahil matapos daw itayo ang tulay ay napansin na ang tubig sa ilalim nito ay umiikot na parang gulong.

            Nakakatuwang isipin na may mga kabataan na may malasakit at inisyatibo na tumulong sa paglilinis at pangangalaga ng mga Pamana ng Lahi na mayroon tayo. Nawa ay mas dumami pa ang mga kabataan na maging aktibo sa pagsusulong ng pangangalaga sa mga Pamana ng Lahi.

            Ang proyektong ito ay naging posible sa pamamagitan ng HUMMS Society at Presidente nitong sil Leah C. Labordo, mga guro na sina Ma. Aileen A. Averilla, Master Teacher, Social Science; Edmar G. Rada, Teacher II, DISS; Kathrin P. Fidelino, Teacher II, Community Engagement, Solidarity and Citizenship at Jezreel Iyyar D. Valdeavilla, Teacher I.

            Pasasalamat sa suporta nina Kapitan Arthur C. Obciana ng Barangay Mateuna, Kapitana Zenaida N. Lubiano ng Barangay Lakawan at ng Oplan Sagip Tulay.

Ang Lawa ng Dagatan

            Isang paglalakbay papunta sa Lawa ng Dagatan ang inorganisa ng Oplan Sagip Tulay nitong Agosto 20 at ito ay dinaluhan ng ilang mga empleyado ng lokal na pamahalaan gayundin ng ilang mga volunteers.

            Ang Lawa ng Dagatan ay matatagpuan sa pusod ng kagubatan ng Barangay Ibabang Palale, Lungsod ng Tayabas. Kung lalakarin ng balikan mula sa boundary ng Barangay Liwayway sa bayan ng Mauban ito ay tinatayang aabot sa humigit-kumulang labing-limang kilometro at maaring tumagal ng anim hanggang sampung oras na paglalakad.

            Hindi biro ang lakarin para makarating sa Dagatan. May ilog at mga sapa na kailangang daanan gayundin ang mga taas at babang mga burol at ang maputik na lupa sa panahon na medyo o katatapos lang ng ulan.

            Maraming magagandang tanawin ang makikita sa daraanan kung saan ay may mga nakatalaga ring lugar na maaaring pagpapahingahan ng mga manlalakbay. Ang isa pang atraksyon bago sumapit sa Dagatan ay ang isang malaki at matandang puno na may napakalaking butas sa katawan nito ngunit nananatili pa ring buhay hanggang sa kasalukuyan.

Bagaman at may kahirapan ang paglalakbay papuntang Lawa ng Dagatan ay sobrang sulit naman ang lahat ng pagod sa oras na kaharap mo na ang mahiwagang Lawa ng Dagatan. Ayon sa mga taga-roon ay kailangang mag-paalam sa mga “naninirahan” sa lawa sa tuwing bibisita dito.

Lubhang nakakamanghang isipin kung paano nga ba nagkaroon ng lawa sa mataas na bahagi na ito ng kabundukan at hanggang sa kasalukuyan ay wala pa ring makapagsabi kung saan nga ba nagmumula ang tubig sa Lawa ng Dagatan. Nananatiling misteryo ang hiwaga ng pinagmumulan ng Dagatan Lake.

Sa kasalukuyan ay dinarayo na rin ito ng mangilan-ngilang mga banyagang turista at gayundin ng ilang mga mag-aaral para sa kanilang mga research at proyekto.

Kung magagawan lamang ng kalsada o pathway ay malaking tulong na upang mas lalong maakit ang mga turista na dayuhin ang Lawa ng Dagatan.

Iminumungkahi lamang na iwasan ang mag-ingay ng husto at panatilihing malinis ang paligid at wag mag-iiwan ng kalat kapag bumisita sa lawa. Tulad nga sabi sa isang kasabihan:

“Take nothing but pictures,

Leave nothing but footprints,

Kill nothing but time.”

Nagpapasalamat nga pala ang OST kay Kapitan Emilio Naynes ng Barangay Ibabang Palale gayundin sa mga Barangay Tanod na sina Gelacio Jasolin Jr., Pedrito Caagbay at Gregorio Datos na nagsilbing mga guide sa pagpunta sa Dagatan Lake.

BRIDGE AND RIVER CLEAN UP DRIVE OPERATION

Kasabay ng selebrasyon ng International Coastal Clean-Up at Festejo de Los Angeles isang paglilinis sa mga ilog at mga tulay ng siyudad ang isinagawa sa pangunguna ng Tayabas City LGU, Oplan Sagip Tulay at GSO / ESWM Unit – Eco-Park nitong Setyembre 23, 2017.

            Umabot sa mahigit tatlongdaang (300) katao ang naki-isa sa clean-up drive na ito. Dinaluhan din ito nina Konsehal Albert I. Dimaranan at Konsehala Precy O. Glorioso na nag-iwan din ng isang mensahe para sa mga taong dumalo sa pagtitipong ito.

            Maging si Ginoong Romeo Cariaga, OIC – Eco-Park ay nagbigay ng pananalita para sa okasyong ito.

            Nilinis ang dalawang “puentecito” o maliliit na mga tulay na matatagpuan sa Barangay Baguio. Nagsagawa din ng paglilinis sa Puente del Isabel II at sa Ilog Iyam na matatagpuan sa Barangay Malao-a. Kasunod nito ay naglinis din sa Puente de Don Francisco de Asis na matatagpuan naman sa Barangay Calumpang.

            Nitong Setyembre 30 at Oktubre 7 ay muling bumalik ang Oplan Sagip Tulay, GSO / ESWM Unit – Eco-Park, Tayabas City DRRMO at Tayabas Rescue Response Team sa Puente de Asis upang ipagpatuloy ang paglilinis sa nasabing tulay. May mga nag-rappelling din upang mas lalo pang pag-ibayuhin ang isinagawang paglilinis at inaasahang babalik pang muli ang mga grupong ito hanggang tuluyang malinis ang Puente de Asis.